٦ وسائل تساعدك على التفوق الدراسي
كيف اتفوق في دراستي؟
كيف افهم الدرس؟
كيف انجح بالاختبار من اول مره؟
كيف اجيب افكار جديده للبحوث والمشاريع؟
كثير كانت تجيني الأسئله ودايم انحرج ولا اعرف اجاوب شخصيا مره حابه اخدم الشخص الي يسألني ومقدره انه يطلب المساعدة لكن فعليا ماعمري فكرت بالجواب لأني ماكنت اشوف الي اسويه شيء مميز أو يذكر. لكن من فترة قررت اركز على الاشياء الي اسويها وتساعدني وقررت اشاركها معكم حتى لو كانت بسيطة يمكن البعض يجهلها واتمنى تكون مفيده!
دائماً اسمع تعليقات الدكتور او الدكتوره مايعرفون يشرحون، الدرس معقد، المده قصيره، كيف تنجحين في الاختبارات؟ الإجابة ببساطه انا اخذ خطوتين زياده عنك اذا الدكتور شرحه مو كويس اروح ابحث عن الموضوع بنفسي، اذا الموضوع معقد احاول ابحث عن شروحات مبسطة وابحث عن وسائل تسهل المهمه، اذا وقت الكلاس قصير احاول استغل اوقات البريكات أو الويكند علشان اعوض النقص. كلنا نتمنى افضل المعلمين وان المعلومه تدخل بسهوله بس ربي خلقنا مختلفين وبقدرات مختلفة. الدكتور الي تشوفه سيء بالنسبة لك يمكن يكون خيار أمثل لطالب الي جنبك ف لازم نستوعب ان الدراسة بالأول وبالاخير مسؤوليتنا.
مره مؤمنة بمقولة (work smarter not harder) يعني ببساطه علشان تتفوق مو لازم تتخذ الطريقه الصعبه لكن اتبع الطريقة الأذكى. كثير كنت اسمع مامعنا وقت نقرأ الكتاب كله او نحفظ المعلومات… السؤال مين طلب منك تقرأ الكتاب كامل؟ اغلب الكتب العلمية مصممه انه تشرح بالتفصيل الممل وتعيد النقطه اكثر من مره بصياغات مختلفة ف انت مو ملزوم تحفظ كل نقطه اذا فهمت الخلاصة من الدرس.
علشان ماطول الموضوع اليوم حبيت اشارككم أفضل ٦ وسائل ساعدتني بفهم اغلب الدروس وتسهيل المهام والواجبات و الأهم انها كلها مجانية!
اولاً: تطبيقات قوقل (Google)
https://about.google/intl/en/products/
تطبيقات قوقل ( docs, slides, sheets…) اغلبها مثل برامج مايكروسوفت اوفيس بس اشوفها اسهل للاستخدام وتقدر تستخدمها بالجوال او اي جهاز تسجل دخول بايميلك < اعتقد مايكروسوفت تطورت كثير بهذا المجال بس غالبا ما نواجه مشاكل معها في الشغل الجماعي بعكس قوقل. قوقل اسهل واغلب الناس تستخدمها لأن مو الكل عنده وصول لمايكروسوفت بعيدا عن هذا قوقل توفر لك الخيار انه اكثر من شخص يقدر يشتغل بنفس الصفحه او العرض حتى انت تقدر تشتغل بنفس الصفحه من اكثر من جهاز! تقدر تكتب الواجب من جوالك ترفع الصور بسهوله وترسلها بسهولة وبنفس الوقت تقدر تحول الملف وورد او بي دي اف بكل سهولة وترسلها ايميل!
ثانيا: كويزلت (Quizlet)
من اشهر المواقع والتطبيقات لدراسه اذا كانت الماده مشهورة ف بتلاقون مجموعات جاهزه تستفيدون منها او تقدرون تسوون بنفسكم الفكره الأساسية هي فلاش كارد الفلاش كارد لو ما تعرفها هي وسيلة فعالة لحفظ وفهم المعلومات فكرتها انك تحط السؤال أو المفردة بالصفحه الأمامية والتعريف أو الجواب بالصفحة الخلفية. الموقع ايضاً جدا مفيد لاختبارات الهيئة أو الاختبارات مثل القدرات والتحصيلي. وبنفس المجموعة الي تسويها تقدر تسوي اختبار بالطريقه الي تفضلها، تلعب العاب، تحديات، حتى تقدر تسوي فيها العاب جماعية اذا مهتمين بهذا الموضوع ممكن انزل تقرير مفصل عن كويزلت!
!واتمنى الكل يشارك ويخلي حسابه مفتوح علشان الفائده تعم الكل والمحتوى العربي يزيد!
ثالثاً: يوتيوب (Youtube)
ومين مايعرف يوتيوب الحين؟ يوتيوب من أكبر النعم بحياتنا كل تخصص يخطر على بالك راح تلاقي شروحات وتعليمات ابحث عن الي يناسبك ويناسب تخصصك.
CrashCorse
Khan Academy ايضا لهم تطبيق
TED-Ed
القنوات هذي من اكثر القنوات شهرة فيها اكثر من ماده ومجال ومقاطع بسيطه فعليا احيانا اشوف مقطع عشر دقائق عن محاضرة ساعتين واطلع فاهمتها!
وغالبا كل تخصص فيه قنوات مشهورة وخاصه فيه بالنسبه للتخصصات الصحية بإذن الله يجي يوم واسوي موضوع خاص و احط فيه اغلب القنوات والاشياء الي فادتني كثير.
رابعاً: التجميعات
اذا تعرف احد في المرحله الي قبلك او لو الكتاب الي تدرسه مشهور راح تلاقي كتب تلخيص او بنك أسئلة طبعا ماقولك يعتمد عليها تماما او الاسئله نفسها بس جدا جدا مهمة لتوضيح الفكره الأساسيه. والاسئله تعطيك تقييم مبسط لفهمك وتصور عن طريقة الاسئله الي ممكن تجيك خصوصاً في المرحلة الجامعية لأن اغلب الاسئلة معقدة وتحتاج تفكير نقدي وتحليل أكثر من مجرد معلومه.
خامساً: بينترست(Pinterest)
طبعاً ممكن البعض يتفاجئ فيه لأن بالغالب التطبيق معروف أفكار الديكور، التوزيعات، والتصوير…لكن بنترست ايضاً مليان وسائل تعليميه مبسطه مثل الخرائط الذهنيه والمنشورات. وبالنسبة للمشاريع، التوزيعات، والتصاميم بالغالب اقتبس افكاري منه لأنه مليان افكار بسيطه وملهمه!
سادساً: قرامرلي (Grammarly)
اذا دراستك بالانجلش نصيحة تستخدم قرامرلي. ايضاً طلاب المدارس راح تستفيدون منه في مادة الانجلش. تقدر تستخدمه وانت تكتب يصحح لك الأغلاط الواضحة تلقائي او تكتب بحثك او واجبك بس قبل تسلمه تحمله ويوضح لك لو كان فيه جملة ناقصة أو فيه خطأ املائي أو بعلامات الترقيم…حتى فيه كيبورد تقدر تحمله بالجوال ويصحح السبيلينق وانت تكتب رساله بسيطه.
طبعاً لكل تخصص فيه احتياجات مختلفة لكن هذي الاشياء الي استخدمها بشكل مستمر و اشوفها مفيده للكل لكن متأكده فيه وسائل اكثر و اتمنى تشاركونها والكل يستفيد!
و نقطه مهمه لازم نفهمها ان التوفيق بالأول والأخير بيد رب العالمين لكن الاخذ بالاسباب واجب وربي يكتب لنا التوفيق بالدنيا والآخره!
قد يعجبك هذا أيضا
