متابعة استخدام التقنيه والإنقطاع عنها
هل عمرك فكرت كم ساعه تقضيها باستخدام التقنيه ووسائل التواصل الإجتماعي؟
هل عمرك تخيلت حياتك بدونها؟
هل فكرت بتأثيرها على حياتك؟
قبل سنه تقريبا كان عندي واجب ممتع ومفيد ويستحق المشاركه الفكره من الواجب اننا نتابع استخدامنا للتقنية والسوشال ميديا لمدة ثلاث ايام بعدها نقطع استخدامها تماما لمدة ٢٤ ساعة ونكتب عن تجربتنا.
الواجب كان مقسوم جزئين جزء عن تجربتنا خلال مراقبة استخدمنا لتقنيه والسوشال ميديا لمدة ثلاث ايام مثل هل كان متوقع عدد الساعات الي قضيناها باستخدام الأجهزه؟ قد ايش التقنيه جزء كبير من حياتنا؟ و انطباعنا عنها؟ والجزء الثاني عن تجربتنا بالانقطاع عنها تماما كيف شعورنا اثناء التجربه؟ كيف اثر علينا الانقطاع؟ و انطباعنا العام عنها؟
الجزء الأول:
بالبدايه تابعت استخدامي للاجهزه وروتيني اليومي لمدة ثلاث ايام بالنسبه لي ماكان فيه شيء يذكر او غير متوقع. التقنيه جزء كبير من حياتي سواء كنت واعيه بهالموضوع او لا. اقوم من النوم على صوت منبه الجوال، اشيك على ايميلي، الطقس، ،واذا معي وقت اشيك على بعض وسائل التواصل الاجتماعي. بعدها اطلع للجامعه بالطريق احياناً اسمع مقاطع او كتب صوتيه واذا وصلت ٩٠٪ من كلاساتي تستخدم التقنيه. ارجع للبيت اكمل واجباتي بالابتوب، اطلع لصاله اهلي يكونون مشغلين التلفزيون او جولاتهم بصوت عالي، اطلع محلات الشاشات و الاعلانات بكل مكان يعني نوعاً ما يمر يوم بدون تقنيه.
لكن الي صدمني عدد المرات الي ارفع فيه الجوال بس علشان اشيك على الوقت او عدد المرات الي افتح موقع الجامعه علشان اشيك اذا الدرجات نزلت او لا حتى لو كنت توي طالعه من الاختبار بخمس دقائق عقلي اللاواعي يروح يشيك بدون شعور .
انطباعي عن التجربه كان جميل. لما اشوف استخدامي للأجهزه وعالمنا الحين ما اقدر اتخيل عالم بدون تقنيه او سوشال ميديا. بغض النظر عن السلبيات الي تجي منها ماقدر اقول اني مصدومه او مستاءه من استخدامي لها. مؤمنه ان التقنيه والسوشال ميديا من اكبر نعم الله علينا والي طورت حياتنا بشكل كبير. فعلياً اعتقد انه ماينفع نلوم السوشال ميديا لتأثيرها السلبي علينا او حتى نلوم انفسنا باستخدامنا الكبير لها لكن ضروري جداً ان الشخص يكون واعي بمدى استخدامه والمحتوى الي محيط فيه.
الجزء الثاني:
بالنسبه للإنقطاع عنها كان الموضوع شيق بديت التجربه يوم السبت طبعا ما طفيت الاجهزه نهائي علشان يكون الحساب دقيق وبما انه في وسط أيام الدراسه ماقدر استغني عن الابتوب وواجباتي ( لأنها مستثناة من التجربة) مع ذلك التزمت ماستخدمتها لأي شيء ثاني غير الواجبات.
اختيار اليوم كان جدا صعب فكرة اني بقفل كل شيء كانت مخيفه بعض الشيء ولو اني اصنف من أقل الأشخاص استخدام للجوال لكن معرفة ان الجوال قريب مني دائما كانت معطيتني الاحساس بالأمان. اخترت يوم السبت لأن عندي أقل واجبات وبالعاده ماتوصلني مكالمات او ايميلات كثير بالويكند.
توقعاتي قبل التجربة انها بتكون صعبه جدا وممكن يكون عندي وقت فراغ أكثر.
أول شيء لاحظته اني ماكنت متحمسه اقوم بدري لأن بالعاده اول ماقوم اشيك على الايميل او قروب العائله. الخطة كانت اني راح اكتب ملاحظاتي وانطباعي خلال اليوم بس من اول محاوله بطلت من بديت اكتب ملاحظات وانا افضل اكتبها بالجوال ونادر ما اكتب باليد ف كان الموضوع صعب وممل بالنسبه لي التكنولوجيا سهلت حياتنا بشكل كبير ف مو قادره اكتب يد وانا عارفه انها فتره مؤقته وبقدر اكتب بالجوال.
صحيح اني ما اعتبر نفسي مدمنة اجهزه بس فعليا استخدمها بشكل كبير في حياتي ويمكن اعتبر اعذر لنفسي ان استخدامي كله مهم ومو مضيعة للوقت. صحيح الجوال اسهل بالبحث عن المعلومات، حل الواجبات، او الجدول مع ذلك قدرت امسك نفسي وخلصت كل الواجبات باستخدام الكتب والجدول المطبوع.
عدم استخدامي لتقنيه خلاني اقدر التقنيه ووسائل التواصل الإجتماعي اكثر. التقنيه سهلت حياتنا وقربتنا من بعض اكثر. صحيح بعض الأحيان الواحد يمكن يتضايق لما يكون الي جالس معه يستخدم جواله لكن احيانا الأجهزه هي السبب الي جمعنا. بدون التقنيه راح نكون مشغولين بمشاغل الحياة الي قدرنا نستغني عنها بلمسة زر. التقنيه وفرت علينا جهد التسوق، دفع الفواتير ، او الإجراءات الورقيه الي كانت في زمن تاخد ساعات او ايام ومشاوير الحين كلها صارت اونلاين وسهله بفضل الله.
انطباعي عن لتجربه انها وسعت مداركي. صحيح اعتمادنا على التقنيه مخيف لو انعدمت، لكن التجربه خلتني اقدر النعمه أكثر اقدر نعمة الأشياء البسيطه بحياتنا و تعودنا على وجودها.
ختاماً
صحيح ان التقنيه ووسائل التواصل الإجتماعي نعمه كبير علينا لكن حلو الواحد يكون واعي باستخدامه و ايش او مين يتابع ويعرف متى وصل مرحلة الإدمان او الإسراف( انه لا يحب المسرفين). التقنيه راح تاخذ جزء كبير من وقتنا وعمرنا الي راح نحاسب عليه ف القرار راجع لنا بالاختيار بايش نبغى نستغل هذي النعم!
التجربه كانت جدا بسيطه وجميله و اتمنى تجربونها و تلاحظون تأثيرها عليكم واذا ممكن تشاركون تجربتكم و انطباعكم عنها!
واخيراً ربي يديمها علينا من نعمه ويجعلها شاهده لنا لا علينا!
