٥ نصائح لبداية العام الدراسي الجديد

كيف استعد لترم الجديد؟

كيف أنظم وقتي وجهدي؟

ايش الاشياء الي استخدمها؟

اول شيء حابه انبه انه ما احب استخدم كلمة ضرورة أو هذا الشيء لازم يسوى او احسسك انه فيه طريقه وحده صحيحه فقط لكن الهدف اني اشارك طريقتي واتمنى انها تفيد اي شخص.

مع بداية كل فصل أحب يكون عندي كالندر/ جدول:

سواء تصممه بنفسك او جاهز لكن افضل يكون من نفس البلد الي انت ساكن وتدرس فيها علشان يكون فيه أهم الأحداث و المناسبات والإجازات الرسمية علشان تكون بعين الاعتبار مع مواعيد الواجبات والاختبارات طبعا الخيارات والاشكال واسعه اختر المناسب لك. عن نفسي جربت اكثر من نوع بس بالفتره الاخيره صرت أفضل المقاس الكبير لأن واجباتي ومهامي صارت أكثر.

!واذا معك وقت اكثر حلو تكتبها بالجوال او الايباد علشان تتذكرها دائما.

طريقتي أحدد لكل مادة لون واكتب فيها الواجبات والاختبارات وإذا الماده تحتاج ملف او دفتر احاول قد ما اقدر انسق الألوان مع بعض علشان عقلي الباطني يربطها ببعض.

بهذي الطريقة اقدر انظم وقتي على الواجبات اذا عندي الخميس تسليم بحث اعرف انه يحتاج اقل شيء ثلاث ايام احاول قد ما اقدر اخلص المهام الأسهل بالايام الي قبل علشان اتفرغ للبحث اذا عندي واجبات اقل احاول اخذ من واجبات الاسبوع الجاي الي يكون مضغوط وبكذا اكون نظمت وقتي اكثر و وازنت الخطة اكثر علشان اقلل من احتمالية اني اواصل او اسهر ويتلخبط جدولي بسبب مهام يوم او اسبوع مضغوط لأن الا مايجي يوم يكون عندك اختبارين أو بحث مع اختبار او دكتور يضيف كويز او واجب مفاجأة!

استخدم قائمة المهام (To do list):

هذي استخدمها للمهام اليومية كل مهمه كبيره او صغيره زي ارسال او رد على ايميل او حتى طلب كتاب أحب استخدمها إلكتروني وورقي الالكتروني لكل كبيرة وصغيرة بحياتي والورقي بالغالب للمهام الدراسية.

طباعة المواد وشراء الكتب والمذكرات:

اذا تفضل تطبع المحاضرات أو تعيد كتابة ملاحظاتك حاول تخلص المهام اول باول لا تنتظر إلى يوم الاختبار لأن بيضيع وقتك تجمع وتطبع ويمكن فجأة يخلص الحبر! بهالطريقه ايضا بيكون معك وقت تذاكر أكثر والمحاضرات قدامك طول الوقت.

اطبع وسلم كل الواجبات قبل وقت التسليم لا تأجل لأي سبب ماتدري ايش الظروف بتكون او تعاون الدكتور معك اذا انت بالجامعه متوقع منك تكون شخص مسؤول ويعمل حساب كل الظروف من الأعذار الغير مقبوله ( ماعندي نت، خلص حبر الطابعه، ماعندي طابعه، طفى الكهرب، علق الموقع، ما وصل كتابي…) الدكتور له كامل الحق انه يرفض هذي الأعذار لأن بالغالب موعد التسليم محدد من زمان وانت معك وقت اكثر لكن هذا مايمنع اذا حصل لك أي ظرف من الظروف تتواصل مع دكتورك باسرع وقت ممكن وتوضح له ظروفك و انك بتحاول تحل المشكله باسرع وقت.

مشتريات:

طبعا كل مرحلة دراسية، عمرية، أو حتى تخصص له احتياجات معينة فانت اعرف بايش الاحتياجات الضرورية .

لكن أهم نصيحة اقدر اعطيك اياه قد ماتقدر استغني عن حاجة الناس وطلب أدوات من غيرك غير انه غير لائق بكل كلاس تطلب قلم زائد ممكن يعطي انطباع سيء قدام المعلم او الدكتور او حتى زملائك.

بالنسبه لي في البيت أفضل يكون عندي طابعه وورق طباعة مع ان جامعتي توفر طابعة والات تصوير ويمكن تطلع بسعر اوفر من البيت بس احيانا تخلص الواجب بالليل والمكتبة مسكره و محاضرتك بدري الصباح ليش التهور والتوتر اذا اقدر استغني عنه.

في كل مراحلي الدراسية مستحيل اطلع بدون قلم رصاص، قلم حبر أزرق، دفتر، ستكي نوتز، ملف لتنظيم الأوراق المهمه علشان لا تتعفط ولا تضيع لا سمح الله.

!و بالجامعه مستحيل استغني عن الابتوب او الايباد ويكونون مشحونين بالكامل!

مكان الدراسه او العمل:

دائماً حاول قد ماتقدر تذاكر وتشتغل في نفس المكان والأفضل يكون المكان مرتب وخالي من الملهيات علشان ما يتشتت تفكيرك باشياء ثانيه او تنشغل كيف بترتبه. والترتيب عامله معاملة الواجبات حاول ترتب المكتب او مكان . الدراسه اول باول علشان لا تتراكم الأشياء وتتكاسل عنه. والأفضل يكون الجدول وقائمه المهام يكونون بمكان واضح وقدام عيونك دائماً علشان تتذكر المهام.

طبعاً هذي الاشياء الي خطرت على بالي واحسها جداً مهمة وتساعد في تنظيم الوقت سواء في الدراسه او العمل اذا عندكم اقتراحات جديدة تستحق التجربة شاركونا وخلونا نتبادل المنفعة!