كيف استخرج الفيزا الأمريكية؟
ي اهلاً وسهلا بالجميع
اليوم باذن الله راح اتكلم عن طريقة استخراج الفيزا الامريكيه بأنواعها ( دراسة ، سياحة ، عمل ، علاج )
طبعاً نسبة كبيرة معتمدين على المكاتب السياحيه بهذا الموضوع ولكن هو أسهل بكثيير مما نتخيل ، ومن وجهة نظري أمان لمعلوماتك الشخصية أكثر وتكون واثق انك تعرف كل الاجابات المدونة بالنموذج حق الطلب.
علشان نبدأ لازم نعرف الأشياء اللي راح نحتاجها:
- أول شيء تحتاج جواز سفر ساري المفعول لا يقل عن ست شهور
- صوره مقاس ٢*٢ انش (٥*٥ سم) بخلفيه بيضاء شروط الصوره تلاقونها في الرابط لأن الشروط تتغير من فتره لفتره
https://travel.state.gov/content/travel/en/us-visas/visa-information-resources/photos.html
- ضمان مالي للطلاب المبتعثين تستخرجه من جهة الإبتعاث او كشف حساب من البنك او تعريف بالراتب على حسب الغرض من الفيزا الهدف اثبات انك قادر على دفع تكاليف الرحلة لأمريكا
- I -20 للفيزا الدراسية فقط مع تسديد السيفيس قبل موعد المقابله
انواع الفيزا:
فيزا دراسيه: الطالب الرئيسي راح يحتاج فيزا F1 الي هي الفيزا الدراسية الي تتطلب انك تكون طالب مستمر بدوام كامل يعني لازم تلتزم بعدد ساعات معين على حسب المرحله الدراسيه
و فيزا F2 للمرافقين الي مع الطالب الرئيسي F1 سواء الزوج او الزوجة أو الأبناء أقل من ٢١ سنة. المرافق يسمح له بدوام جزئي و الأبناء يسمح لهم بالتعليم العام.
فيزا السياحة والعمل والعلاج: نفس الفيزا تعرف ب B1/B2
الحين نجي لأهم شيء الخطوات وهي عبارة عن ٤ خطوات اساسيه:
تنطبق على كل الأنواع راح اشرحها بالتفصيل
أول وأطول خطوة هي تعبئة نموذج DS-160 في هذا الرابط.
الي راح تتدخل فيه كل البيانات الرئيسيه والغرض من السفر وراح ترفع فيه الصوره. طبعاً النموذج يعبئ لكل شخص لحال حتى لو كان رضيع!!
https://ceac.state.gov/genniv/
إذا دخلت على الرابط راح تكون هذي اول صفحه
حدد الدولة مكان السفاره الي راح تقدم عليها اذا كان اول مره تبدأ النموذج اختر الخيار الأول( start an application) اذا راح تكمل نموذج سابق اختر الخيار الثاني (retrieve an application) راح يرجعك للنموذج الأول تكمل بياناتك.
بعدها راح تجيك اول صفحه
لازم تحفظ الرمز الشريطي وجواب السؤال علشان تقدر ترجع تكمل النموذج في وقت ثاني وايضاً راح يكون هو الرقم الأساسي لحجز موعد المقابلة.
بعدين تبدأ راح تجيك اسئله لازم تجاوب كلها الا لو كان مكتوب اختياري او لا ينطبق
الأسئلة راح تكون بالانجلش ولازم تعبي بالانجلش الا لو مكتوب جاوب باللغة الأم وهو سؤال واحد فقط اكتب اسمك بالعربي لكن لو حطيت السهم فوق السؤال او ضغطت على السؤال راح يطلع لك الترجمة ف لا تشيل هم حتى لو لغتك بسيطه راح تقدر تكمل الخطوات بسهوله بإذن الله!
حاول بين كل صفحه وصفحه تضغط “Save” حفظ علشان لو وقفت لأي سبب من الأسباب مايروح كل شغلك على الفاضي.
اخر خطوه هي رفع الصوره طبعاً تقدر تاخذها بأي جوال مو لازم استديو تصوير و المميز بالموقع انه يبين لك على طول اذا الصوره انقبلت او لا وبعدها تقدر تطبعها
راجع معلوماتك ووقع النموذج و بعدها ضروري تطبع النموذج وترسل نسخة لايميلك احتياط
سويت فيديو بسيط لتوضيح الخطوات *جميع المعلومات المدخلة وهمية لتوضيح الفكره فقط
ثاني خطوه حجز الموعد:
https://cgifederal.secure.force.com/?language=Arabic&country=Saudi%20Arabia
عن طريق هذا الموقع تسجل ايميلك وبياناتك وتستخدم الرمز الشريطي من نموذج DS-160 وتكمل بعض الأسئلة المتكررة لحد ما توصل نقطة الدفع راح يعطيك خيارين اذا كان عندك حساب سامبا تقدر تدفع اونلاين او لازم تروح اقرب فرع سامبا وتاخذ الرقم المرفق وتدفع رسوم الفيزا ٦٠٨ ريال سعودي وضروري تحفظ الايصال معك
بعد يوم عمل تقريباً راح تقدر تحط رقم الايصال وتفتح لك المواعيد علشان تحدد موعد المقابلة
بعد ما تأكد موعد المقابله لازم تتطبع الموعد مع الباركود
وبكذا نكون انهينا الاجراءات الإلكترونية
ثالث خطوه المقابلة: ايش تحتاج وايش تتوقع خلال المقابله؟
اول شيء تأكد ان كل المتطلبات المكتوبة في النموذج متوفر وتقدر تاخذ اوراق احتياط تدعم طلبك لو احتاجوها
الأشياء الضرورية هي جوازك، طباعة الموعد مع الباركود، طباعة نموذج DS-160، طباعة الصور الشخصية المرفقه، الضمان المالي، إيصال الدفع
واذا كنت طالب ضروري ضروري الأي توني وإيصال دفع السيفيس
طبعاً عند الدخول للسفارة زي اغلب السفارات ممنوع الأجهزة الإلكترونية والجوالات يفضل تتركها بالسياره واذا ماتقدر فيه خدمة انهم ياخذونها منك.
المقابله جداً جدً بسيطه هي فقط للتأكد من هويتك والتبصيم والتحقق من الأوراق والمعلومات المقدمة لهم.
أكثر أسئلة كانت تجيني هل لازم اتكلم انجلش؟ اكيد افضل يكون عندك الأساسيات لكن ابداً مو ضروري اغلب الموظفين يتكلمون عربي بسيط او راح يوفرون لك مترجم بسهوله و بالغالب ماتحتاج لأنها كلها اشياء بسيطه.
راح يطلب منك الأوراق وتبصم و بالغالب يقولك بنفس اللحظه اذا الفيزا مقبولة او لا وراح ياخذ الجواز منك ويقولك راح توصلك رساله من ٣-٥ أيام عمل اذا خلصت الفيزا وتستلمها من المكان الي حددته بالموقع الي حجزت فيه الموعد. في حالات نادرة ممكن تاخذ مده اطول.
رابع خطوه هي استلام الجواز:
الاستلام راح يكون من المكان المحدد مسبقاً علشان تستلم جوازك لازم تكون معك بطاقة الهوية وتقدر تسوي تفويض لشخص يستلمها لكن لازم تعبي النموذج هذا علشان يقدر يستلمها
https://www.ustraveldocs.com/dz_ar/LetterOfAuthority.pdf
وبكذا تكون انتهيت ومبروك عليك الفيزا!
معلومات اضافيه:
غالبا مدة الفيزه خمس سنوات وراح تقدر تستخرج الفيزا حتى لو كان باقي سنة على انتهاء جوازك مع إمكانية استخدام الفيزا مع جواز ثاني
اذا ماحصلت الا موعد بعيد احجز اقرب موعد ومن فترة لفترة ادخل الموقع لأن كثير ممكن يلغون مواعيدهم وتحصل موعد
ايضاً فيه ميزة مواعيد الطوارئ لأسباب معينه ممكن تقدر تطلب موعد طوارئ وراح يجيك ايميل بقبول او رفض الطلب. اذا انقبل راح يفتح لك موعيد خاصه قريبه!
طبعاً هذا الموضوع اجتهاد شخصي ومن تجارب شخصية اذا عندكم اسئله زياده اسألوها وبإذن الله راح اجاوب عليها.
