التعليم عن بعد واختلاف الشخصيات!
هل انت مع او ضد التعليم عن بعد؟ بغض النظر عن ظروف كورونا
!بما ان اغلبنا الحين تقريباً عنده تجربة كافيه يعطينا رأي حسيت الموضوع بيكون شيق للنقاش
خلونا نتكلم من ناحية الإيجابيات والسلبيات؟
ايش افضل خيار بالنسبة لك؟ والسبب؟
ايش تأثير كل نظام تعليم على شخصيتك وتعليمك؟
كيف تتوقع التعليم بيكون في المستقبل؟
.قبل فترة نزلت الأسئلة في احد وسائل التواصل الاجتماعي وجتني بعض الاجابات الشيقه حاولت اضيف بعضها
أطفال
اول شيء بتكلم عن جانب الأطفال والمرحلة الابتدائية عموماً الأغلبيه كانت مستاءة و قالوا مره ماينفع لصغار وانهم مره مو مستوعبين الفكره الا وحده كنا نتناقش انا وياها وكانت مؤيده من تجربتها مع ولدها
بالنسبه لصغار احس صدق صعب عليهم خصوصاً انهم ممكن لحد الآن مو مستوعبين فكرة التعليم وأهميته وإذا ما توفرت البيئة المناسبة والأهل ماكنت من اولوياتهم او عندهم الكفاءة لمساعدة طفلهم اكيد بتكون التجربه صعبه
طبعاً اكيد المدارس ومخالطة اطفال من بيئات ومجتمعات مختلفة تضيف كثير لشخصية وتجارب الطفل بالحياة ومحد يختلف فيها وهذا من أساسيات التعليم والمدارس
لكن التعليم عن بعد فيه جانب ايجابي للأطفال الانطوائيين او الهاديين عموماً لقوا انفسهم بالاونلاين اكثر حتى الأطفال الي يحبون التقنيه
من تجربة الطفل الي تكلمت عنه ماكان يشارك بالفصل لأن ماكان يلقى فرصه لكن لما صاروا عن بعد صار يشارك ويتحمس لدراسه حتى معلمه لاحظ الفرق! كلنا نعرف وشفنا أو عشنا مع أطفال يحبون ياخذون كل السالفه ف طبيعي فيه اطفال مايجيهم نصيبهم حتى لو كانوا اذكى او بنفس مستوى الذكاء
طبعاً كل خيار فيه ايجابيات وسلبيات بس اتمنى التعليم يوصل مرحلة التوازن وتوفير الفرص لكل الشخصيات. كل شخصيه مهمه وكل شخصية لها طريقة مختلفة بتلقي المعلومة واتوقع اننا وصلنا مرحله من العلم والتطور الي المفروض نلتفت لهالموضوع ونتقبل وسائل التعليم الجديدة
متفائله جداً ان المنصة صدق بتكون جزء من التعليم بالمستقبل حتى لو رجعت الأوضاع طبيعية
الكبار
بالنسبة للكبار فيه وجهات نظر كثيرة وطبعاً الموضوع زي ماقلت كان نقاش مافيه صح او خطا بس كذا حبيت نتناقش ونفهم وجهات نظر بعض
بالغالب كانت التعليقات ضد الفكرة تماماً بحكم انه الشخص مايقدر يضبط نفسه ووقته، يحب يكون عضو فعال بالفصل ويشوف ويخالط الناس ويتعلم من التجربه اكثر من ورا الشاشه. اشخاص كانوا ضد التقنيه تماماً ويفضلون التعليم التقليدي. احد يشوفها صعبه ومعقده. فيه ناس تحب تطلع تغير جو وتتحمس للبس الدوام كل يوم
وفيه جانب مؤيد تماماً كثير مرتاحين من المشاوير والزحمات، يفضلون التعليم عن بعد لأن يقدرون يفتحون الدرس وهم جالسين مرتاحين بغرفهم ما يشيلون هم اللبس و تجهيز الشنطه او حتى تجهيز الفطور لهم او لأطفالهم. بعضهم يحس بحرية أكثر بوقته، البعض توفر لهم وقت أكثر. البعض قال ان الطلاب صار لهم مسؤولية بتعليمهم وطور بشخصياتهم أكثر
تجربه شخصيه
من تجربتي بالتعليم دايم اصنف introvert بالشخص الخجول، الهادئ، الإنطوائي، غير اجتماعي، والبعض ممكن يفكر …انه ماعندي ثقه بالنفس
طبعاً التصنيفات ابد ماتزعلني لأنها حقيقه انا شخصيه هاديه وافضل اكون بقروب صغير واشخاص اعرفهم و امون عليهم مره ولا احب اتكلم الا اذا عندي شيء مهم لكن اني مو واثقه احس فيه استعجال بالقرار شوي
الحمد لله تجاربي بالتعليم لا بأس بها لأني الحمد لله كنت ببيئه مناسبه ساعدتني افهم نفسي اكثر واكون متصالحه مع شخصيتي واعرف اني مو اقل من غيري بس اعرف كثير يواجهون مشاكل وضغط نفسي بحكم اختلاف شخصياتهم أو المعلمين مو فاهمينها حتى
اذا بتكلم عن تجربتي بالتعليم في السعودية الحمد لله ابد ما كان الموضوع صعب لأن بالغالب المعلمين يفضلون الي ساكت وكافي خيره وشره عن اللي يتكلم طول الوقت بدون فائده بس من تجربتي في امريكا الهادي يعتبر خجول وماعنده ثقه بالنفس
لكن بالواقع شخصياتنا مو مفهومه يعني لو درست معك فتره وعرفتك بكون شخص مختلف تماماً لكن احتاج وقت اطول اتأقلم و بالغالب ما اتأقلم الا بنهاية الترم والمعلمين والطلاب يتغيرون. اقدر اعد المعلمين الي منت عليهم أو ارتحت لهم من خلال تعليمي او حتى أخذوا خطوه زياده وعطوني فرصه اعطي اكثر
والحمد لله حالياً كثير مدرسين وباحثين متوجهين لهذا الجانب ويسوون بحوث ودراسات بهالموضوع. وهذا الشيء يطمئن لأن حرام عقول وشخصيات تندثر بس بسبب انها ما أعطيت حقها
ايش دخل الموضوع بالاونلاين؟
بغض النظر عن كل فوائد الاونلاين الي ذكرت أول شيء لاحظته على نفسي انه عطاني فرصه اكون نفسي مايحتاج اتصنع او اطلع من منطقة الراحه حقتي طبعاً عارفه انه مو هو الحل الأمثل لكل المواد لكن فتح جانب جديد
مثال أخذت نفس الدكتور بمادتين كلهم يحتاجون فلسفة وتحليل وكلام كثير الاولى كانت حضوري كنت اغلب الكلاس ساكته لأن فيه شخصيات دايم تاخذ السالفه و ما تعطي فرصة لغيرها ابدا ولو قلت رأي مختلف ممكن يهاجمونك ف كان الدكتور ماعنده وسيلة يقدر يقيمنا فيها إلا بالمقالات أو الاختبارات. طبعاً الحمد لله كانت تعليقاته دائماً ايجابية لي بس كنت بالغالب اطفش من الكلاسات لأن نسمع نفس الرأي من الطلاب او احيانا طالب واحد فقط!ا
الثانيه اخذتها اونلاين كنا نستخدم زي المنتدى بموقع الجامعه وكان الدكتور يطرح السؤال او موضوع النقاش ولازم كلنا ننزل مشاركتنا بنفس اليوم ف كلنا عندنا فرصه نتكلم بنفس الموضوع ومحد يقاطع احد او ياخذ وقت اكثر من الثاني ف كان الدكتور عنده فرصة لتقييم والرد علينا واحد واحد واتذكر كان يعلق على تعليقاتي انها مميزه ومختلفه حتى مره علق وقال انا عارف انه بعضكم مره مرتاح وابدع بالاونلاين أكثر. وصدق كنت اقرأ اراء كثيره ومختلفه لو كنا بالكلاس مستحيل يكون هذا التنوع
هل انا متحيزه للإنطوائيين؟
ممكن اكون متحيزة بعض الشيء للانطوائيين بس مو هذا الهدف الهدف انه نفهم ونقدر غيرنا. ولا يفهم من كلامي ان التعليم التقليدي كله غلط او الشخصيات الاجتماعية سيئه بالعكس كلها مهمه لكن بالغالب الاجتماعيين مو محتاجين احد يتكلم عنهم
اتذكر وحده من المعلمات كانت تسميني البطل الصامت وثانيه كانت تتكلم علينا نهاية الترم وتقولنا عن انطباعها عنا اول الايام كانت مصدومه لما عرفت اني نهله كانت تقول مستحيل هي الميته الي جالسه ورا
طبعاً كل نظام أضاف لشخصيتي وتعليمي شيء كبير وما اقدر اتخيل حياتي بدون اي واحد منهم بس صدق اتمنى يجي يوم تتوفر الخيارات لكل شخصية
والدليل كلامي هذا لأني اكتب من غرفتي وانا مرتاحه وبيئة مريحة لنفسيتي لو كنت شخص ما امون عليك و قابلتك باجتماع كبير ممكن تقول مين النفسية او المغروره الي ماتتكلم مع احد
اتمنى الخيار يكون دائماً متوفر مو شرط الكل يدوام عن بعد بس اقل شيء يكون مدموج اتذكر احد كلاساتي الكبيرة كان الدكتور يستخدم السبورة الذكية ويخلي مربع للمشاركة نقدر ننضم اونلاين ونكتب بالسبورة من اجهزتنا وحنا بالكلاس مو لازم صراخ من آخر القاعة
وعادي الناس تختلف الاخوان يختلفون انا وأخوي عكس بعض انا مستعده اكتب و اقرأ سالفة صفحتين بس ما اسجل فويس نوت او اسمع احد وأخوي العكس عادي يقولي اقري المكتوب لأن مايحب يقرأ وكل محادثتنا انا اكتب وهو يرد فويس وعايشين الحمد لله
من وجهة نظري بغض النظر عن الظروف الحالية اعتقد التعليم عن بعد ممكن يقلل كثير من المشاكل الصحية والنفسية للأطفال والكبار بيقلل الزحمات والمشاوير الطويله الي مو دايم لها داعي
رد على بعض التعليقات
أكثر من شخص علق انه بالعكس الواحد مفروض يطلع من منطقة الراحة احس منطقة الراحة مُساء فهما بعض الاحيان مو معناتها انه الواحد حياته كلها تكون تغيير وتجارب لازم يكون فيه توازن واستقرار. وبالعكس انا لما قلت منطقة الراحة اني مرتاحه مو معناته اني كسوله وجالسه بنفس المستوى ماتطورت ولا تغيرت بالعكس انا من اكثر الاشخاص الي احب اتعلم و اجرب اشياء جديده واسافر و اتعرف على أماكن وعادات وتقاليد وأديان جديده بس لما اتكلم عن شيء مريح لنفسي اتكلم عن الحالة الطبيعية الي انا مستقره فيها
لنضرب مثال شخص اجتماعي ويحب يقابل ناس جديده كل يوم ويسولف مع اي شخص حتى لو ما قابله الا دقيقتين وجهوري بشخصيته ويحس انه هذا مكانه والوضع المريح له ومايحب يجلس لحاله ابد تجي تقوله لا لازم تطلع من منطقة الراحة حقتك وتجرب تجلس لحالك وما تتكلم مع احد وممكن بس تقرأ او تكتب.اكيد بنقول خير ان شاء الله ايش التعقيد النفسي لشخص ومو منطقي الكلام بالضبط هذا الي يصير للعكس لما يطلب من الانطوائيين يكونون اجتماعيين ويحسسون انهم غلط او فيهم مشكله
طبعاً الحين الحمدلله احس فيه تقدم كبير بفهم الاختلاف بالشخصيات سواء بالمستوى الدراسي او الوظيفي وفيه دراسات كثيره ايضاً اثبتت انه القاده الانطوائيين يبدعون بنفس مستوى الاجتماعيين او أكثر في بعض الاحيان فهذا يعطي أمل بإذن الله
!!شكرا لوقتك وجدا متشوقه لمشاركة تجربتك و رائيك
اذا مهتم في هذا الموضوع أنصح بقراءة كتاب
(Quiet the power of introverts in a world that can’t stop talking by Susan Cain)
