ماهي العنصرية؟
“العنصرية” ايش اكثر شيء يخطر على بالك اذا شفت او سمعت الكلمه؟
من المواضيع الي اشوفها جداً مهمه ولازم نتكلم فيها وبإذن الله هذه المساحة بتكون جداً مناسبة للنقاش الراقي والمحترم. هل تؤيد مقولة اننا كشعب مسلم، سعودي، عربي ما عندنا عنصريه؟ مااتكلم عن تعاليم الإسلام قد ما اتكلم عن المجتمع الواقعي.
من وجهة نظري اشوف اننا مع الأسف عندنا عنصرية بشكل كبير بس متخفية بمسميات واشكال مختلفه.
اول شيء كثير من الناس عندها مفهوم ان العنصرية ابيض او اسود فقط لكن العنصرية اكبر من كذا بكثير وتشمل اشكال كثيره. العنصرية مو بس مقتصرة على اللون.
صح ممكن مانشوفها كثيره بمجتمعنا ببساطة لأن الأغلبيه نفس اللون ف ما تشاف بشكل كبير لكن المصطلحات المستخدمة بوصف البشره الغامقه حتى لو ماكانت مباشره لهم كفيله بانها تكون نوع من انواع العنصرية. كثير نسمع مصطلحات مثل: عبد، زنجي، تكروني، خال….الخ ولا كلمة من هالكلمات تصفهم بشكل إنساني أو حقيقي. ويجيك رد كلنا عبيد لله ايه صح كلنا عبيد لله لو كنت تقول الكلمه لكل الناس معك حق.
النوع الأهم والمنتشر عندنا العنصريه القبليه/ العوائل/ الجنسيات/ المناطق الخ.. مع ان مافيه شخص ما تعلم الحديث: ( يا أيها الناس ألا إن ربكم واحد وإن أباكم واحد ألا لا فضل لعربي على أعجمي ولا لعجمي على عربي ولا لأحمر على أسود ولا أسود على أحمر إلا بالتقوى)
والايه {يا أيها الناس إنا خلقناكم من ذكر وأنثى وجعلناكم شعوباً وقبائل لتعارفوا إن أكرمكم عند الله أتقاكم إن الله عليم خبير} سورة الحجرات(١٣)
الا ان نسبة كبيرة يرددها ولا يطبقها. هذا قبيلي هذا لا، هذا حضري هذا بدوي، هذا سعودي هذا اجنبي…
اووه هذا قصيمي او جنوبي او حجازي… طبعاً هالمسميات في أحسن الأحوال ما يحتاج نذكر التسميات السيئة لكل فئة.
حنا مانزوج العائله الفلانيه، حنا ما نصادق من…، حنا مانأجر او مانبيع ل… هذا الحي او المنطقة… وما الى ذلك من أشكال العنصرية والظلم.
اذا شافوا احد ما اعجبهم لا هذا مو سعودي او اكيد امه اجنبية وكأننا شعب منزه عن الغلط؟ او استخدام جنسيات معينة لوصف الغباء او الكسل او اي صفة سيئة لفئة أو جنسية معينة.
بس مع الاسف الأغلب مايشوف التصرفات غلط لأنه تربى او طلع على هالشيء وماعنده استعداد يخالف مجتمعه حتى لو كان غلط. كلنا نستنكر قول القدامى لما قالوا هذا ما وجدنا عليه آباءنا ولا اقتنعوا بالتوحيد… لكن بالواقع الأغلب جالس يعيد نفس الغلطه بس باشياء ثانيه.
مافيه عرق ولا جنس ولا عائله افضل من أحد كل فئه فيها الجيد والسيئ لكن اذا استمريت تلقب احد بشيء سيء طبيعي ماراح تشوف ال الجانب السيء منه وافعالك العنصرية ممكن تأدي ان الطرف الآخر يضطر يسوي اشياء غلط غصب عليه
وكما وصانا رسولنا دعوها فإنها منتنة !
بالأخير كلنا ممكن نتفق أو لا نتفق لكن مايمنع اننا نفتح المواضيع ونتناقش بروح مرحه و هدفها اننا نرتقي مع بعض كإخوان مسلمين وبشر
وما ناخد كل شيء شخصي
ممكن تشاركنا بموقف صار لك او صار قدامك كان فيه نوع من انواع العنصريه و ايش كان موقفك او شعورك؟
